Büdcənin xərcləri azaldılır. Dövlət büdcəsinin xərcləri 2020-ci il üçün 27 milyard 492 milyon 200 min manat təsdiq edilib. Xərclərin 2021-ci ildə 25 milyard 847 milyon 500 min manat olacağı proqnozlaşdırılır.
 

2021-ci ildə dövlət büdcəsinin gəlirləri 24 milyard 327 milyon manat məbləğində proqnozlaşdırılır.

İnsider.az xəbər verir ki, Azərbaycan Respublikasının 2021-ci ilin dövlət və icmal büdcələrinin ilkin göstəricilərinə dair açıqlamasında bildirilir ki, gəlirlərin 57,3 faizi və ya 13 milyard 950,0 milyon manatı neft sektorunun, 42,7 faizi və ya 10 milyard  377,0 milyon manatı qeyri-neft sektorunun payına düşür.

Neft sektoru üzrə büdcə gəlirlərinin 87,5 faizini və ya 12 milyard 200 milyon manatını Azərbaycan Respublikasının Dövlət Neft Fondundan transfert, 12,5 faizini və ya 1 milyard  750,0 milyon manatını vergi orqanlarının xətti ilə neft sektorundan daxilolmalar təşkil edir. 2021-ci il üçün icmal və dövlət büdcəsinin gəlirləri hesablanarkən neftin bir barelinin qiyməti daha mühafizəkar yanaşma əsasında 35 ABŞ dollarına bərabər götürülmüşdür

2021-ci ildə dövlət büdcəsinin xərcləri 25 milyard 847 milyon 500 min manat məbləğində proqnozlaşdırılır. Xərclərin 18 milyard 106,6 milyon manat və ya 70,1 faizini cari xərclər, 5 milyard 389,1 milyon manat və ya 20,8 faizini əsaslı xərclər, 2 milyard  351,8 milyon manat və ya 9,1 faizini dövlət borcuna və öhdəliklərinə xidmətlə bağlı xərclər təşkil edir.

Qeyd edək ki, Azərbaycan Respublikasının 2020-ci il dövlət büdcəsinin gəlirləri 24 milyard 124 milyon min manat, xərcləri 27 milyard 492 milyon 200 min manat (o cümlədən mərkəzləşdirilmiş gəlirləri 23 milyard 359 milyon  465 min manat, yerli gəlirləri 764 milyon 535  min manat, mərkəzləşdirilmiş xərcləri 26 milyard 677 milyon 330  min manat, yerli xərcləri 814 milyon 870  min manat) məbləğində təsdiq edilib.