“AtaBank”ın gəlirləri xərclərini ödəmir. Bankın əməliyyat zərəri 3,2 dəfə artıb. Ötən ilin 9 ayında 1 milyon 545 min manat təşkil etmiş əməliyyat zərəri 2019-cu ilin 9 ayında 4 milyon 969 min manat təşkil edib. Zərərin artması müştərilərə verilən kreditlərin azalması fonunda Bankın gəlirlərinin də azalması ilə bağlıdır.

 Bankın rüblük hesabatına görə, 2019-cu ilin yanvar-sentyabr dövründə “AtaBank”ın cəmi gəlirləri (faiz və qeyri-faiz gəlirləri) 28 milyon 340 min manat, cəmi xərcləri isə (faiz və qeyri-faiz xərcləri) 33 milyon 309 min manat təşkil edib. Xərclər gəlirləri üstələdiyindən 4 milyon 969 min manat əməliyyat zərəri yaranıb.

Müqayisə üçün qeyd edək ki, ötən ilin yanvar-sentyabr dövründə “Ata Bank”ın cəmi gəlirləri 35 milyon 333 min manat, cəmi xərcləri 36 milyon 878 min manat təşkil etmiş və nəticədə Bankın 1 milyon 545 min manat əməliyyat zərəri yaranmışdı.

“AtaBank”ın gəlirləri xərclərindən daha çox azalıb.

“AtaBank” ASC 2019-cu ilin 9 ayını cəmi 22 min manat xalis mənfəətlə başa vurub. Xalis mənfəət əvvəlki dövrlərdə ehtimal olunan kredit itkiləri üçün yaradılmış ehtiyatdan qaynaqlanır.  Ehtiyatdan 4 milyon 991 min manatın azad olması həm əməliyyat zərərini bağlayıb, həm də cüzi xalis mənfəət qalıb.

Bank ötən ilin 9 ayının yekunları üzrə 86 min manat xalis mənfəət açıqlamışdı. Aktivlər üzrə mümkün zərərlərin ödənilməsi üçün yaradılmış ehtiyatın 1 milyon 631 min manatının azad olması həm bankın əməliyyat zərərini bağlamış, həm də 86 min manat xalis mənfəəti təmin etmişdi.

Ötən ilin 9 ayında “AtaBank”ın faiz gəlirləri 31 milyon 274 min manat ikən, bu ilin 9 ayında 24 milyon 856 min manat təşkil edib. Qeyri-faiz gəlirləri isə 4 milyon 59 min manatdan 3 milyon 485 min manata düşüb.

BANK KİÇİLİB, KREDİTLƏR AZALIB

30 Sentyabr 2019-cu il tarixində “AtaBank” 532 milyon 74 min manat cəmi aktivlərə malik olub. Aktivlərin 374 milyon 712 min manatını müştərilərə verilən kreditlər təşkil edib. 31 Dekabr 2018-ci il tarixində "AtaBank" 581 milyon 110 min manat cəmi aktivlərə malik idi və  aktivlərin 428 milyon 565 min manatını müştərilərə verilən kreditlər təşkil etmişdi. Beləliklə, 9 ay ərzində Bankın aktivləri 49 milyon 36 min manat, kredit portfeli isə 53 milyon 853 min manat azalıb.

30 Sentaybr 2019-cu il tarixində "AtaBank" 137 milyon 466 min manat məcmu kapitala malik olub. "AtaBank"  böyük məbləğdə kapitala malik olan banklardan biridir. 

Son aylar “AtaBank” rəhbərliyində dəyişikliklərin edilməsi ilə gündəmdədir. Bankın sahibi qurumun gəlirlə işləməsi üçün hərəkətə keçib. 137 milyon manatdan çox kapitalı olan bankın 22 min manat xalis mənfəət əldə etməsi sahibkarı narahat etməyə bilməz.

25 İyul 2019-cu il tarixində “AtaBank”ın səhmdarlarının yığıncağı keçirilib. Yığıncaqda Bankda islahatların aparılmasına, o cümlədən Müşahidə Şurasının və İdarə Heyətinin dəyişdirilməsinə qərar verilib. 

Sonuncu dəfə Ağakərim Məlikaslanov “AtaBank”ın İdarə Heyətinin sədrinə müavin təyin edilib.

Xatırladaq ki, “AtaBank” ASC-nin nizamnamə kapitalının 86%-i “Synergy Group” MMC-yə,14%-i fiziki şəxslərə (Əşrəf Kamilov 9,3%, Mahir Rəfiyev 4,7%) məxsusdur.