Mərkəzi Bankın İdarə Heyətinin faiz dəhlizinin parametrləri barədə növbəti qərarı 2019-cu il aprelin 26-da ictimaiyyətə təqdim ediləcəkdir.

İnsider.az xəbər verir ki, sabah Azərbaycan Respublikası Mərkəzi Bankı yeni faiz qərarını açıqlayacaq.

Mərkəzi Bankın sədri Elman Rüstəmov saat 11:00-da faiz dəhlizinin parametrlərini elan edəcəkdir.

Bundan əvvəl, Azərbaycan Respublikası Mərkəzi Bankının İdarə Heyəti uçot dərəcəsinin 9.25%-dən 9%-ə endirilməsi haqda qərar qəbul etmişdi. Faiz dəhlizinin yuxarı həddi 11%, aşağı həddi isə 7% (uçot dərəcəsinə ±2%-lik simmetrik diapazonda) səviyyəsində müəyyən edilmişdi. Qərar 15 mart 2019-cu ildən qüvvəyə minmişdi.

"Mərkəzi Bankın cari ildə faiz dəhlizinin parametrlərinə dair növbəti qərarları inflyasiyanın faktiki və proqnoz səviyyəsi, ona təsir edən risklər balansının qiymətləndirilməsi əsasında veriləcəkdir", - Elman Rüstəmov bildirmişdi. 

Mərkəzi Bank, yenilənmiş proqnozlara görə  2019-cu ildə inflyasiyanın hədəf daxilində (4±2%) qərarlaşacağını gözləyir.

İNFLYASİYA CÜZİ ARTIB

2019-cu ilin yanvar-mart aylarında istehlak məhsullarının və xidmətlərin qiymətləri 2018-ci ilin müvafiq dövrünə nisbətən 2,1 faiz, o cümlədən ərzaq məhsulları, içkilər və tütün məmulatlarının qiymətləri 1,5 faiz, qeyri-ərzaq mallarının qiymətləri 1,2 faiz, əhaliyə göstərilən ödənişli xidmətlərin qiymətləri 3,6 faiz bahalaşmışdır.

Cari ilin mart ayında fevral ayına nisbətən istehlak məhsullarının və xidmətlərin qiymətləri 0,6 faiz, o cümlədən ərzaq məhsulları, içkilər və tütün məmulatlarının qiymətləri 1,3 faiz, qeyri-ərzaq mallarının və əhaliyə göstərilən ödənişli xidmətlərin qiymətləri isə 0,1 faiz bahalaşmışdır.

2019-cu ilin yanvar-fevral aylarında istehlak məhsullarının və xidmətlərin qiymətləri 2018-ci ilin müvafiq dövrünə nisbətən 1,9 faiz, o cümlədən ərzaq məhsulları, içkilər və tütün məmulatlarının qiymətləri 1,0 faiz, qeyri-ərzaq mallarının qiymətləri 1,2 faiz, əhaliyə göstərilən ödənişli xidmətlərin qiymətləri 3,5 faiz bahalaşmışdı.

Cari ilin fevral ayında yanvar ayına nisbətən istehlak məhsullarının və xidmətlərin qiymətləri 0,6 faiz, o cümlədən ərzaq məhsulları, içkilər və tütün məmulatlarının qiymətləri 1,1 faiz, qeyri-ərzaq mallarının qiymətləri 0,1 faiz, əhaliyə göstərilən ödənişli xidmətlərin qiymətləri isə 0,2 faiz bahalaşmışdı.

Həmçinin, son depozit və not hərraclarında Mərkəzi Bank elan etdiyi vəsaiti cəlb edə bilməyib. Faizlər aşağı düşdükcə hərraclar banklar üçün maraqsız olur.

Azərbaycanda maaşların, sosial müavinətlərin artması, problemlemli kreditlərə görə ödənilən kompensasiya inflyasiyanın cüzi yüksəlməsinə səbəb ola bilər.