2019-cu ilin ilk 5 ayı ərzində Azərbaycan banklarının xarici öhdəlikləri 320,5 milyon manat azalıb.

İnsider.az xəbər verir ki, Mərkəzi Bankın statistikasına görə, 2018-ci ilin sonunda 1 milyard 828,1 milyon manat olmuş xarici öhdəliklər 2019-cu il Mayın sonunda 1 milyard 507,6 milyon manata düşüb.

Ötən ilin May ayının sonu ilə müqayisədə bankların xarici öhdəlikləri 356,2 milyon manat azalıb.

Xatırladaq ki, 2017-ci ilin Avqust ayında Azərbaycan banklarının xarici öhdəlikləri 6 milyard 428 milyon manat təşkil edirdi. Azərbaycan Beynəlxalq Bankında aparılan sağlamlaşdırma tədbirlərindən sonra xarici öhdəliklər sentyabrında 2 milyard 706 milyon manata düşümüşdü (3 milyard 722 milyon manat azalmışdı).

Devalvasiyalardan əvvəl, 2015-ci ilin Yanvarında, bankların xarici öhdəlikləri 4 milyard 936 milyon manat təşkil edirdi.  Devalvasiyalardan sonra, 2016-cı ilin Yanvarında, bankların xarici öhdəlikləri 8 milyard 386 milyon manata yüksəlmişdi.