Ötən il iki ölkə arasında ticarət dövriyyəsi 26,3% artaraq 240,11 milyard dollara çatıb.Bu rekord göstəricidir.

Çinin Rusiya ilə ticarət dövriyyəsi 2023-cü ildə 26,3% artaraq 240,11 milyard dollara çatıb.

Bu barədə Çin Xalq Respublikasının Baş Gömrük İdarəsi məlumat yayıb.

Məlumata görə, bu dövrdə Çindən Rusiya Federasiyasına ixrac 46,9% artaraq təxminən 110,97 milyard dollar təşkil edib. Rusiya mallarının idxalı 12,7% artaraq 129,14 milyard dollar olub. Son 12 ayda Rusiyanın müsbət saldosu 2022-ci ilə nisbətən təxminən yarıya qədər azalaraq 18,17 milyard dollara düşüb.

Dekabrda iki ölkə arasında ticarət dövriyyəsi noyabr ayı ilə müqayisədə 1,8% çox olmaqla 21,9 milyard dollar təşkil edib. Rusiya Federasiyasından idxal ayda demək olar ki, dəyişməyərək 11,19 milyard dollar təşkil edib.Çinin ixracı isə təxminən 4% artaraq 10,71 milyard dollar olub.

Dəyər baxımından Çinin Rusiya Federasiyasından idxal etdiyi malların əsas hissəsini enerji resursları - neft, təbii qaz və kömür təşkil edir. Digər əsas idxal olunan məhsullara mis və mis filizi, ağac, yanacaq və dəniz məhsulları daxildir. Çin Rusiyaya geniş çeşiddə məhsullar - avtomobillər, smartfonlar, sənaye və ixtisaslaşdırılmış avadanlıqlar, oyuncaqlar, ayaqqabılar, nəqliyyat vasitələri, kondisionerlər və kompüterlər ixrac edir.

Rusiya Federasiyası ilə Çin arasında ticarət dövriyyəsi 2021-ci ildə 35,8% artaraq 146,880 milyard dollara, 2022-ci ildə isə 29,3% artaraq 190 milyard dollara çatmışdı.

Rusiya prezidenti Vladimir Putin və Çin sədri Si Cinpin 2024-cü ilədək mal və xidmət ticarətinin həcmini 200 milyard dollara çatdırmağı qarşıya məqsəd qoymuşdular. Onlar birlikdə bu məqsədə vaxtından əvvəl nail ola biliblər.

Çin Xalq Respublikasının Baş Gömrük İdarəsinin məlumatına görə, 2023-cü ildə Çinin xarici ticarətinin həcmi 5% azalaraq 5,93 trilyon dollar təşkil edib.

12 ay ərzində ölkənin ixracı 4,6% azalaraq 3,38 trilyon dollar təşkil edib. İdxal 5,5% azalaraq 2,55 trilyon dollara düşüb. Beləliklə, Çinin bu dövrdə profisiti 2022-ci illə müqayisədə təxminən 6% azalaraq 823 milyard dollara geriləyib.

Dekabrda Çinin xarici ticarət dövriyyəsi noyabr ayı ilə müqayisədə 3,1% artaraq 531,89 milyard dollar təşkil edib. Çinin ixracı ay ərzində əvvəlki ayla müqayisədə 4% artaraq 303,61 milyard dollar, idxalı isə 2,1% artaraq 228,28 milyard dollar olub.

Çin beynəlxalq bazara geniş çeşiddə məhsullar təqdim edən dünyanın aparıcı istehsalçısıdır. Çin əksər ölkələrlə ticarət əlaqələrini fəal şəkildə saxlayır və daim gücləndirir. Moskva Pekinin enerji təchizatının əsas tərəfdaşıdır. Bundan əlavə, Rusiya Federasiyası Çinə ərzaq və digər məhsulların ixracını artırır.

Marja