Brand Finance: Amazon 299,3 milyard dollar dəyəri ilə ən bahalı brenddir. Elektrikli avtomobillərə tələbat artdıqca Tesla və BYD dünyanın ən sürətlə böyüyən markaları arasındadır.

Dünyanın ən böyük onlayn pərakəndə satış şirkətlərindən biri olan Amazon, "Brand Finance Global 500" reytinqində dünyanın ən bahalı brendi seçilib. 

 Amazon, keçən ilki reytinq ilə müqayisədə 51 milyard dollar dəyər itirməsinə baxmayaraq Apple-ı geridə qoyub.

“Amazon brendinin dəyəri 15% azalaraq 350,3 milyard dollardan 299,3 milyard dollara düşməsinə baxmayaraq, dünyanın ən bahalı brendi kimi yerini tutub”, - deyə məlumatda bildirilir.

Apple ikinci yerə düşüb, bu brendin dəyəri keçən illə müqayisədə 16% azalaraq 355,1 milyard dollardan 297,5 milyard dollara geriləyib.

Reytinqdə üçüncü yerdə Google (281,4 milyard dollar), dördüncü yerdə Microsoft (191,6 milyard dollar), beşinci yerdə isə Walmart (113,8 milyard dollar) qərarlaşıb.

Qeyd olunur ki, Twitter və Snapchat siyahıdan çıxdıqdan sonra reytinqdəki texnologiya şirkətlərinin sayı 50-dən 48-ə düşüb.

Dəyərini itirmiş digər texnologiya yönümlü brendlər siyahısına - Samsung Group (brend dəyəri 7% azalaraq 99,7 milyard ABŞ dolları olub), Alibaba.com (brend dəyəri 56% azalaraq 10,0 milyard ABŞ dolları olub), Facebook (brend dəyəri 42% azalaraq 59,0 milyard ABŞ dolları olub) və WeChat (brend dəyəri 19% azalaraq 50,2 milyard ABŞ dolları təşkil edib) daxildir. 

İnstagram (brend dəyəri 42% artaraq 47,4 milyard ABŞ dollarına çatıb) və LinkedIn (brend dəyəri 49% artaraq 15,5 milyard ABŞ dollarına  çatıb) texnologiya sektorunda böyüyüb. 

Tesla (reytinqdə 9-cu yer, brend dəyəri 44% artaraq 66,2 milyard ABŞ dollara çatıb) və BYD (199-cu yer, brend dəyəri 57% artaraq 10,1 milyard ABŞ dollara yüksəlib) ən sürətlə böyüyən brendlərdir.

Marja