Azərbaycan Mərkəzi Bankın sədri Elman Rüstəmov açıq danışmaqda davam edir. O, bu gün ilk dəfə bildirib ki, 2016-ci ildə Azəriqazbank (AGBank) Mərkəzi Bank tərəfindən xilas edilib. Xilasetmənin şərtinə  baxmayaraq bank sağlamlaşdırılmayıb. Nəticədə bu gün kapital çatışmazlığı 212 milyon manat olan bir banka bəzi ekspertlər tərəfindən “bu yaxşı bankdır” deyilməsi qeyri-peşəkarlıqdır.

İnsider.az xəbər verir ki, bunu keçirdiyi mətbuat konfransında Mərkəzi Bankın sədri Elman Rüstəmov bildirib.

Mərkəzi Bankın sədri “Daha çox müzakirələr gedən Azəriqazbank haqqında demək istəyirəm” deyərək sözlərinə belə davam edib:

“Kənar audit 2019-cu ilin nəticələrinə görə bankın kapitalında çatışmazlıq, yəni minus kapital olduğunu qeyd etmişdir. Düzdür bizim qiymətləndirməmizdən aşağı qiymətləndirilmişdir, amma bu məsələ audit tərəfindən də təsdiq olunmuşdur. Bildirmək istəyirəm ki, 2016-cı ildə Mərkəzi Bank tərəfindən bu bankın bir dəfə xilas olunması həyata keçirilmişdir. Bu haqda danışılmır, biz də danışmamışdıq. İndi bildirmək istəyirəm ki, o vaxt biz təxminən əhalinin 77 milyon manat əmanətini bu banka kapital qoyuluşu kimi reallaşdırdıq. Dünyada belə bir təcrübə var. Sonra gözləyirdik ki, bu bank öz kredit portfeli ilə çalışacaqdır, sağlamlaşdırma tədbirləri həyata keçirəcəkdir. Lakin bu baş vermədi, bankın maliyyə vəziyyəti pisləşməyə başladı və dediyimiz səviyyəyə gəlib çıxdı.

“BƏZİ EKSPERTLƏR VƏZİYYƏTİ TƏHRİF ETMƏYƏ ÇALIŞIRLAR”

Bu gün həmin bankda səhmdarlar və əmanətçilər vəsaitlərini itirirdilər. Biz mətbuatı izləyirik, orada gedən müzakirələr ilə tanış oluruq. Bütövlükdə ekspert cəmiyyəti və bizim media işçiləri vəziyyəti əhəmiyyətli dərəcədə obyektiv izah edirlər. Lakin bəzi ekspertlər situasiyanı təhrif etməyə çalışırlar. Mən onların peşəkarlığını şübhə altına alıram ki, bizim məlumatlardan, açıqlamalardan sonra da “bu yaxşı bankdır”, “bu gözəl bankdır” ifadələri işlədirlər. Belə ifadələr peşəkar yanaşma deyil. Əgər kimsə öz peşəkarlığına hörmət edirsə insanları çaşdırmamalıdır. Əgər peşəkarlıq kənara qoyulubsa bunun başqa səbəbləri mümkündür”.

Xəbər verdiyimiz kimi, artıq lisenziyası ləğv edilmiş “AGBank” ASC-də də müvəqqəti inzibatçı tərəfindən aparılmış dəqiqləşdirmələrlə həmin bankın maliyyə vəziyyətinin qeyri-qənaətbəxş olduğu, kapital mövqeyinin tam itirildiyi təsdiq edilmiş və daha da pisləşdiyi məlum olmuşdur. 30 aprel 2020-ci il tarixinə bankın kredit portfelinin 51%-i qeyri-işlək statusundadır. Məqsədli ehtiyatlarda aparılan korreksiyalardan sonra bankın məcmu kapitalı mənfi 167 milyon manat təşkil etmişdir. Kapital mövqeyinin bərpası üçün 212 milyon manat məbləğində əlavə kapital qoyuluşu tələb olunurdu.