Ukraynaya hücum uzun müddətdir planlaşdırılmış, məqsədli işğaldır.

Bunu NATO Baş katibi Yens Stoltenberq Şimali Atlantika Şurasının iclasından sonra keçirilən mətbuat konfransında deyib.

“Qitəmizdə sülh pozulub, bu, Avropanın təhlükəsizliyi üçün ağır zamandır.

Biz Rusiyanın Ukraynaya hücumunu ən qəti şəkildə pisləyirik. Bu, suveren, müstəqil və sülhpərvər ölkəyə hücumdur.

Rusiyanı dərhal hərbi əməliyyatları dayandırmağa, ordusunu Ukrayna torpaqlarından geri çəkməyə çağırırıq”, - Baş katib vurğulayıb.

Stoltenberq Rusiyanın öz gücünü tarixi yenidən yazmaq üçün istifadə etdiyini, bu ölkənin rəhbərliyinin Ukraynanın müstəqil və azad keçmişini inkar etdiyini deyib.

NATO Baş katibi bildirib ki, bu gün Şuranın iclası bloka üzv bəzi ölkələrin istəyi ilə çağırılıb, hansı ki bu ölkələr təhdid hiss edir: “NATO-nun əsas missiyası öz müttəfiqlərini qorumaqdır. Yanlış hesablamalara və yanlış anlaşılmalara yol verilməməlidir. Birinə hücum hamıya hücum deməkdir. Bu bizim kollektiv təhlükəsizliyimizdir”.

Onun sözlərinə görə, son həftələrdə minlərlə hərbçi alyansın şərq qanadına yerləşdirilib, hazırda 100-dən çox hərbi təyyarə NATO-nun hava məkanına nəzarət edir, 120-dən çox gəmi hazır hazırlıq vəziyyətindədir.

NATO Baş katibi deyib ki, Kreml təsir dairəsi yaratmaq, dünyanın qaydalara əsaslanan düzənini dəyişmək istəyir və Rusiya bu addımlarına davam etdikcə ağır nəticələrlə üzləşəcək.

Stoltenberq NATO-nun Ukraynaya qoşun yeritmək fikrində olmadığını da diqqətə çatdırıb: “Bizim Ukraynaya NATO qoşunlarını göndərmək planımız yoxdur. Bizim etdiyimiz iş müdafiə xarakteri daşıyır”.

Marja