Gələn il I sinif şagirdləri üçün Azərbaycan dili və Riyaziyyat fənnindən yeni ehtiyat dərsliklərin istifadəyə verilməsi planlaşdırılır.

İnsider.az-ın məlumatına görə, bunu Təhsil İnstitutunun “Ehtiyat dərsliklər” layihəsinin rəhbəri Zaur İsayev Təhsil Nazirliyinin media üçün təlimində çıxışı zamanı deyib.

Onun sözlərinə görə, hazırda layihə sınaq prosesindədir:

“Bu ilin sentyabr ayından etibarən ölkənin 97 məktəbinin 123 sinfində 3244 şagird üçün sınaq prosesi keçirilir. Nəticələr bu ilin yay ayında müzakirə edilərək müxtəlif təkmilləşmə işləri aparılacaq. Dərsliklərin gələn il istifadəyə verilməsi planlaşdırılır”.

“Həmin dərsliklər iki hissəli olacaq. Birinci hissə I yarımil, ikinci hissəsi isə II yarımildə tədris olunacaq. Bu da I sinif şagirdlərinin çantasını yüngülləşdirəcək. Həmin dərsliklər Təhsil Nazirliyinin nəzarəti altında hazırlanacaq.

Dərsliklər həm Azərbaycan, həm də rus dilində olacaq. Pilot layihə uğurlu olacaqsa, mərhələli şəkildə ibtidai siniflərin hamısı üçün tədricən tətbiq olunacaq”, - deyə nazirlik rəsmisi qeyd edib.

©Oxu.Az