Dünyanın ən böyük açıq səhmdar cəmiyyəti 12 neft şirkətinin cəmi gəlirləri bu ilin ilk yarısında ötən ilin eyni dövrü ilə müqayisədə 3,5 faiz azalaraq 789,4 milyard dollara düşüb.

Dünyanın ən böyük açıq səhmdar cəmiyyəti (səhmləri birjada alınıb satılan) 12 neft şirkətinin bu ilin ilk yarısındakı cəmi gəliri və xalis mənfəəti keçən ilin eyni dövrünə nisbətən azalıb.

İnsider.az xəbər verir ki, 12 neft şirkətinin balanslarından taplanan məlumatlara görə, bu ilin yanvar-iyun dövründə ABŞ-ın ExxonMobil, Chevron, ConocoPhillips, Halliburton, Schlumberger, Baker Hughes, Hollandiyanın Royal Dutch Shell, Böyük Britaniyanın BP, Fransanın Total, İtaliyanın Eni, Rusiyanın Rosneft və Norveçin Equinor şirkətlərinin ümumi gəlirləri 3,5 faiz azalma ilə 789,4 milyard dollara geriləyib. Bu şirkətlər ötən ilin yanvar-iyun dövründə cəmi 818,1 milyard dollar gəlir əldə etmişdilər.

Sözügedən şirkətlərin xalis mənfəəti isə bu ilin ilk yarısında ötən ilin eyni dövrü ilə müqayisədə təxminən 11,5 faiz azalaraq 47 milyard dollara geriləyib. Ötən ilin ilk yarısında bu miqdar 53,1 milyard dollar təşkil etmişdi.

Neft qiymətləri 6,5% düşüb

Neft nəhəngləri arasında bu ilin ilk yarısında ən çox xalis mənfəət əldə edən şirkət 9 milyard dollarla Royal Dutch Shell olub. İkinci yerdə 6,9 milyard dollarla Chevron və üçüncü yerdə 5,9 milyard dollarla Total-dır.

Bu dövrdə ən yüksək gəliri tutan şirkət də 177,5 milyard dollarla yenə Shell olub. Bu şirkətin ardınca 141,1 milyard dollar mədaxillə BP və 132,7 milyard dollarla ExxonMobil gəlir.

Neft şirkətlərinin gəlirlərinin və xalis mənfəətlərinin azalmasına xam neftin qiymətlərinin aşağı düşməsi səbəb olub.

Dünyada ən geniş istifadə edilən Brent tipli xam neftin barrel qiyməti, ötən ilin ilk yarısında orta hesabla 70,6 dollar ikən, bu ilin eyni dövründə isə qiymətlər 6,5 faiz azalma ilə 66 dollara geriləyib.

Xam neftin qiymətlərinin aşağı düşməsinin əsas səbəbləri qlobal neft hasilatındakı artım və ABŞ-Çin ticarət gərginliyinin qlobal neft tələbatını azaltmasıdır.

©Marja