Yaponiyanın paytaxtı Tokioda keçiriləcək Yay Olimpiya Oyunlarında azarkeşlər idmançılara qışqırmadan və mahnı oxumadan dəstək olmalıdır.

İnsider.az "Report" istinadən xəbər verir ki, bu barədə Beynəlxalq Olimpiya Komitəsinin (IOC) təqdim etdiyi "Tokio-2020"nin qaydalarının birinci versiyasında bildirilib.

Qərar koronavirus pandemiyası səbəbindən qəbul edilib. İnfeksiya öskürək, danışmaq, qışqırmaq və ya mahnı oxumaq yolu ilə havadakı damcılar vasitəsilə yayılır. Bu səbəbdən, fanatlar tribunalarda yalnız alqışlardan istifadə etməyə çalışmalıdırlar.

Olimpiada ilə bağlı qaydaların növbəti versiyası apreldə dərc ediləcək.

Qeyd edək ki, Tokio Yay Olimpiya Oyunları koronavirus pandemiyası ilə əlaqədar 2020-ci il 24 iyul - 9 avqustdan bu il 23 iyul - 8 avqusta təxirə salınıb.