Türkiyə Mərkəzi Bankı faizə toxunmadı. Bank pul siyasəti faizini 19% səviyyəsində saxladı. Analitiklərin də proqnozu faizin 19% səviyyəsində sabit saxlanacağı istiqamətində idi.

Türkiyə Mərkəzi Bankı (TCMB) faiz qərarını açıqladı.

Məlumata görə, TCMB faizini dəyişməz saxlayıb.

Əksər bazar iştirakçıları da Türkiyə Mərkəzi Bankının pul siyasəti faizini 19%-də dəyişməz saxlayacağını gözləyirdilər.

Türkiyə Prezidenti Rəcəb Tayyib Ərdoğan Mərkəzi Bankın avqust ayından etibarən faiz azaltmağa başlayacağını və nəticədə də inflyasiyanın düşəcəyini bildirmişdi. Beləliklə, TCMB Ərdoğanın istədiyini etmədi.

Ərdoğanın faiz endirimi çağırışından sonra Türkiyə Mərkəzi Bankının bazarları sakitləşdirmək üçün sərt pul siyasətinə güclü bir şəkildə bağlı olduğunu ifadə etməsi lazım idi. Əks halda Türk Lirəsi kəskin dəyərdən düşə bilərdi.

TCMB açıqlamasında qeyd edib ki, qalıcı aşağı inflyasiya reallaşmadıqca hazırkı sərt pul siyasəti davam edəcəkdir. TCMB 5% inflyasiya hədəfləyir. Ölkədə İyulda inflyasiya isə 18,95% olub. 

"TCMB, əsas məqsədi olan qiymət sabitliyi üçün əlindəki bütün vasitələri istifadə etməyə davam edəcək. Qalıcı aşağı inflyasiya yaranana və 5% hədəfinə çatana qədər siyasət faizi inflyasiya ilə mübarizə edəcək səviyyədə qalacaqdır", - Mərkəzi Bankın açıqlamasında deyilir.

YÜKSƏLƏN QLOBAL QİDA QİYMƏTLƏRİNƏ DİQQƏT ÇƏKİLİB

Qlobal qida qiymətlərinin inflyasiya üzərindəki təsirlərinə diqqət çəkən Mərkəzi Bank qeyd edib: "Beynəlxalq aqrar əmtəə və qida qiymətlərindəki yüksək səviyyələrə əlavə olaraq, əlverişsiz iqlim şərtləri bəzi məhsulların təklifinin azalmasına səbəb olmuşdur. İyul ayında qida qiymətlərində müşahidə edilən artım, inflyasiyadakı yüksəlişdə həlledici olmuşdur".

ƏRDOĞAN MƏRKƏZİ BANKIN AVQUSTDA FAİZ AZALDACAĞINA İŞARƏ ETMİŞDİ

Türkiyə Prezidenti Rəcəb Tayyib Ərdoğan, avqust ayından etibarən inflyasiyada azalma başlayacağını söyləyərək, "Mən siqnalımı müəyyən yerlərə hər halda vermiş oluram, bundan belə inflyasiyanın daha yuxarı çıxması mümkün deyil, çünki faiz nisbətlərində də enişə keçirik", - demişdi.

Canlı verilişdə sualları cavablayan Ərdoğan, "Yüksək faiz yoxdur. Çünki yüksək faiz bizə yüksək inflyasiyanı gətirəcək. Amma aşağı faiz bizə aşağı inflyasiyanı gətirəcək. Avqust ayı qırılma nöqtəsidir və inşallah Avqust ayından etibarən artıq biz aşağı inflyasiyaya keçəcəyik", bildirmişdi.