2022-ci ilin yanvar-oktyabr aylarında ən çox İsveçrə və Çinin valyuta ehtiyatları azalıb.

2022-ci ilin yanvar-oktyabr aylarında valyuta ehtiyatlarda ən böyük azalma pul ifadəsində 226,6 milyard dollar “itirən” və trilyonçular siyahısından çıxan İsveçrədə qeydə alınıb.

Mərkəzi bankların rəsmi valyuta ehtiyatları məlumatları əsasında hesablama aparılıb. Hesablama oktyabr ayı üzrə məlumatı dərc etdirən dünyanın yüz iqtisadiyyatının mərkəzi banklarının məlumatları əsasında aparılıb. Bu müddət ərzində dünyanın heç bir ölkəsi öz ehtiyatlarını 10 milyard dollardan çox artıra bilməyib.

Hesablamalara görə, yanvar-oktyabr aylarında pul ifadəsində ehtiyatların azalmasına görə ikinci yerdə ötən ilin on ayında 211,5 milyard dollar itirən Çin qərarlaşıb. Üçüncü yerdə ehtiyatları 211,2 milyard dollar azalan Yaponiyadır. Sinqapur Mərkəzi Bankının beynəlxalq aktivləri 135,6 milyard dollar, Hindistan Mərkəzi Bankının aktivləri isə 102,5 milyard dollar “buxarlanıb”.

Ötən il Rusiya beynəlxalq valyuta ehtiyatlarından 83,4 milyard dollar itirərək anti-reytinqdə altıncı yerdə qərarlaşıb. Ondan sonra “təhlükəsizlik yastığı” 79,7 milyard dollar azalan Honq-Konq, Cənubi Koreya (-49,1 milyard dollar), Tailand (-44,1 milyard dollar) və Böyük Britaniya (-42,9 milyard dollar) gəlir.

Həmçinin, 2022-ci ilin 10 ayı ərzində Çexiya (-41,7 milyard dollar və ya “ehtiyatların” dörddə biri), Braziliya (-36,7 milyard dollar), İsrail (-24,4 milyard dollar), Almaniya (-23,9 milyard dollar), İtaliya (-20,8 milyard dollar), Fransa (-19,2 milyard dollar) və ABŞ (-18,7 milyard dollar) beynəlxalq valyuta ehtiyatlarından itirib.

Eyni zamanda, faiz ifadəsində bu dövrdə ehtiyatların ən ciddi azalması Şri-Lankada (-46%) və Pakistanda (-43%) qeydə alınıb. Yeni Zelandiyanın aktivlərinin dəyəri 38%, Monqolustanın 36%, Sinqapurun 32%, Panamanın 31%, Çilinin 26%, Çexiya, Yunanıstan və Mavrikininki isə 24% azalıb.

Faiz ifadəsində İsveçrə ehtiyatlarının 20%-ni, Çin 6%-ni, Yaponiya 15%-ni itirib. Rusiyanın qızıl-valyuta ehtiyatları on ayda 13% azalıb.

Eyni zamanda, tədqiq olunan iqtisadiyyatlardan yalnız 15-i valyuta ehtiyatlarını artıra bilib. Səudiyyə Ərəbistanı (7,8 milyard dollar), Türkiyə (2,3 milyard dollar), Qətər (1,9 milyard dollar) və Cənubi Afrika (1,1 milyard dollar) valyuta ehtiyatlarını artırıb.

Marja