“Azəristiliktəchizat” Açıq Səhmdar Cəmiyyəti Xətai rayonu, Mirzə Davud küçəsində qurumun istilik xəttində sızıntı nəticəsində bir sıra yaşayış evlərin və zirzəmilərin su basması ilə bağlı məsələyə münasibət bildirib.

Qurumun Abonent və Müştəri Xidmətlərinin rəisi Rafiq Əliyev açıqlamasında bildirib ki, küçədən keçən istilik xəttində su sızıntısı baş verib:

“Sözügedən ərazidə evlər qanunsuz şəkildə mühafizə zonasında inşa edilib. Oradakı magistral istilik kəməri 198 yaşayış binası, sosial müəssisələr və məktəbi istiliklə təmin edir. Ərazidə sızıntının qarşısını almaq üçün müəyyən bərkitmə işləri aparılıb”.

R.Əliyev qeyd edib ki, Mirzə Davud küçəsində su axıntısının qarşısını almaq üçün su şəbəkədən boşaldılmalıdır. 

“Əgər bu edilsə, orada olan yaşayış binası, sosial müəssisələrdə istilik olmayacaq. Hazırda müvəqqəti tədbirlər görülüb. Hava mülayimləşən zaman tam tədbir görüləcək”.

Oxu.Az