Yaponiyanın Baş naziri Fumio Kişida bu günə planlaşdırılan mətbuat konfransında Rusiyaya qarşı yeni sanksiyaları açıqlayacaq.

Bu barədə “Kyodo” agentliyi məlumat yayıb.

Qeyd olunur ki, yeni sanksiya tədbirləri xüsusilə enerji sektoruna, o cümlədən Rusiya kömürünün idxalına məhdudiyyətlərə təsir göstərə bilər. Mətbuat konfransının yerli vaxtla saat 18:00-dan sonra (Bakı vaxtı ilə 13:00) başlaması gözlənilir.

Bundan əvvəl Yaponiyanın iqtisadiyyat, ticarət və sənaye naziri Koiti Xaqiuda hakimiyyət orqanlarının Rusiyadan kömür idxalının həcmini tədricən azaldacağını açıqlayıb. 2021-ci ildə Yaponiyanın xaricdən aldığı bütün kömürün təxminən 11 %-i Rusiyanın payına düşüb.

Aprelin 7-də “Böyük Yeddilik” (G7) ölkələrinin liderləri enerji sektorunda Rusiyadan asılılığın azaldılması, o cümlədən kömürün idxalının tədricən dayandırılması və qadağan edilməsi planlarının həyata keçirilməsini sürətləndirmək arzularını ifadə ediblər.

Report