azerbaycanda-senaye-mehsullarinin-istehsali-artib

Azərbaycanda sənaye məhsullarının istehsalı artıb

Sənaye müəssisələri və bu sahədə fəaliyyət göstərən fərdi sahibkarlar tərəfindən 2019-cu ilin yanvar-may aylarında 19,6 milyard manatlıq və ya 2018-ci ilin müvafiq dövrü ilə müqayisədə 2,2% çox sənaye məhsulu istehsal edilib. Sənayenin qeyri-neft sektorunda məhsul istehsalı 15,0% artıb.

İnsider.az xəbər verir ki,  Dövlət Statistika Komitəsinin məlumatına görə, sənaye məhsulunun 69,9%-i mədənçıxarma sektorunda, 25,1%-i emal sektorunda, 4,3%-i elektrik enerjisi, qaz və buxar istehsalı, bölüşdürülməsi və təchizatı sektorunda, 0,7%-i isə su təchizatı, tullantıların təmizlənməsi və emalı sektorunda istehsal olunmuşdur.

Mədənçıxarma sektorunda neft hasilatı 2,9% azalmış, əmtəəlik qaz hasilatı isə 40,4% artmışdır.

Emal sektorunda ağacın emalı və ağacdan məmulatların istehsalı 92,8%, avtomobil, qoşqu və yarımqoşquların istehsalı 63,9%, içkilərin istehsalı 59,8%, toxuculuq sənayesi məhsullarının istehsalı 47,4%, maşın və avadanlıqların quraşdırılması və təmiri işləri 46,7%, mebel istehsalı 45,8%, rezin və plastik kütlə məmulatlarının, kağız və karton istehsalının hər biri 32,8%, kimya sənayesi məhsullarının istehsalı 30,4%, hazır metal məmulatlarının istehsalı 21,1%, qida məhsullarının istehsalı 20,5%, poliqrafiya məhsullarının istehsalı 19,5%, əczaçılıq məhsullarının istehsalı 16,8%, maşın və avadanlıqların istehsalı 15,8%, tütün məmulatlarının istehsalı 14,9%, tikinti materiallarının istehsalı 5,0% artmış, geyim istehsalı 0,1%, sair nəqliyyat vasitələrinin istehsalı 1,8%, elektrik avadanlıqlarının istehsalı 7,9%, kompüter, elektron və optik məhsulların istehsalı 8,8%, metallurgiya sənayesi məhsullarının istehsalı 18,4%, dəri və dəri məmulatlarının, ayaqqabıların istehsalı isə 27,7% azalıb.

Elektrik enerjisi, qaz və buxar istehsalı, bölüşdürülməsi və təchizatı sektorunda istehsalın həcmi 0,4 faiz, su təchizatı, tullantıların təmizlənməsi və emalı sektorunda isə 8,0 faiz artmışdır.