Bu günə qədər Azərbaycanda kümçülər “Azəripək” MMC-yə 610,9 ton yaş barama təhvil veriblər.

İnsider.az xəbər verir ki, bu barədə  Kənd Təsərrüfatı Nazirliyindən bildirilib.

Məlumata görə, bunun 11,5 tonu ötən gün təhvil verilib. Ən çox yaş barama təhvili iyunun 13-də qeydə alınıb - 121,7 ton. 

Barama tədarükünə görə Zərdab, Ağcabədi, Zaqatala, Füzuli, Balakən, Şəki, Bərdə, Qax, Kürdəmir, Ağdaş, Ağdam, Tərtər rayonları öndədir. Bu günədək Zərdabda 65,3 ton, Ağcabədidə 53,5 ton, Zaqatalada 52,6 ton, Füzulidə 49,6 ton, Balakəndə 44,1 ton, Şəkidə 43,4 ton, Bərdədə 36,4 ton, Qaxda 26,8 ton, Kürdəmirdə 22,5 ton, Ağdaşda 17,4 ton, Ağdamda 16,8 ton, Tərtərdə 16,6 ton, Göyçayda 15,7 ton, Sabirabadda 14,0 ton, Qəbələdə 13,9 ton, Ucarda 11,6 ton, Şəmkirdə 10,9 ton yaş barama tədarük olunub. Hazırda ölkə üzrə 38 rayonda yaş barama tədarükü aparılır.

"Baramaçılığın və ipəkçiliyin inkişafına dair 2018–2025-ci illər üçün Dövlət Proqramı"nın icrası nəticəsində 2025-ci ilə qədər yaş barama istehsalı həcminin 6 min tona çatdırılması nəzərdə tutulur.

Yaş barama istehsalı dövlət tərəfindən subsidiyalaşdırılır. Kümçülər yaş baramanı kiloqramı 4 manatdan “Azərİpəy”ə təhvil verirlər. Dövlət əlavə olaraq hər kiloqram yaş barama istehsalına görə fermerlərə 5 manat subsidiya ödəyir.

Ümumilikdə fermer təhvil verdiyi hər kiloqram yaş baramanın əvəzində 9 manat alır.

Baramaçılığın yem bazasının yaradılması məqsədilə son üç ildə Çindən ölkəmizə 3,5 milyon ədəd tut tingi (çəkil) gətirilərək rayonlarda əkilib. Sonuncu dəfə 2018-ci il dekabrın 4-də Çindən gətirilən 1 milyon ədəd tut tingi 36 rayon üzrə paylanıb və əkini aparılıb.