Azərbaycan Türkiyə və Gürcüstan Parlamentlərinin Beynəlxalq əlaqələr üzrə komitələri müntəzəm olaraq üçtərəfli formatda görüşlər keçirir. Azərbaycanın təşəbbüskarı olduğu ilk görüş Gürcüstan və Türkiyə parlamentinin komitə sədrlərinin iştirakı ilə Bakıda keçirilib. 

İnsider.az xəbər verir ki, cari ilin may ayında Gürcüstanda keçirilməsi planlaşdırılan növbəti iclas dünyada yayılan yeni koronovirus COVİD-19 infeksiyasına görə təxirə salındı. 

Üç ölkənin Beynəlxalq münasibətlər üzrə komitələrinin görüşünün keçirilmə vaxtı və formatına dair məlumat üçün Azərbaycan Milli Məclisinin Beynəlxalq münasibətlər və Parlamentlərarası əlaqələr Komitəsinin sədri Səməd Seyidova müraciət etdik.

“Azərbaycan tərəfi olaraq, mən Türkiyənin Böyük Millət məclisinin Xarici İşlər Komissiyasının rəhbəri cənab Volkan Bozkır və Gürcüstan Parlamentinin xarici əlaqələr Komitəsinin sədri İrakli Beraia ilə danışıqlarda bu iclasın onlayn rejimdə keçirilməsini təklif etdim. Hər iki həmkarım bu təklifə müsbət yanaşdı. Beləliklə də, may ayının 12-də onlayn rejimdə Azərbaycan-Türkiyə-Gürcüstan arasında keçiriləcək üçtərəfli iclasda ölkələr arasında siyasi, iqtisadi, mədəni əlaqələrimiz geniş şəkildə müzakirə ediləcək”, - deyə millət vəkili Səməd Seyidov bildirib. 
Bununla yanaşı millət vəkili dünyanın bir sıra ölkələrində COVİD-19 yayılmasının qarşısını almaq məqsədilə həyata keçirilən tədbirlərə dair Azərbaycanın təcrübəsinin, elan edilmiş karantin rejiminin, bu rejimin yumşaldılması ilə əlaqədar meydana çıxan təhlükənin də müzakirə obyekti olacağını da dedi.

“İclasda həmçinin Prezident İlham Əliyevin bu yaxınlarda Türkdilli Dövlətlərin Əməkdaşlıq Şurasının videokonfrans vasitəsilə fövqəladə Zirvə görüşü və Qoşulmama Hərəkatının Təmas Qrupunun onlayn səviyyəli Zirvə görüşündə təqdim etdiyi, Azərbaycanın COVİD-19 pandemiyası ilə mübarizə üsulları və təcrübəsi də həmkarlara çatdırılacaq. O cümlədən, postpandemiya dövründə infeksiyanın ikinci dalğasının qarşısını almaq istiqamətində birgə fəaliyyətdə Parlamentlərin rolunu müzakirə etmək niyyətindəyik. Heç kim üçün sirr deyil ki, bu dəhşətli infeksiya hələ də böyük təhlükə mənbəyi olaraq qalır. Karantin rejiminin yumaşaldılması zamanı lazımı qaydalara riayət edilmədiyi halda bu təhlükə artmaqda davam edəcək. Buna görə də cənab Prezidentin dediyi kimi, Bu bəlanın bir əlacı var, o da birgə fəaliyyətdir. 

Üç ölkənin Parlament nümayəndələri olaraq bu birgə fəaliyyəti müzakirə etmək niyyətindəyik”.