Bu gün Yaponiyanın Osaka şəhərində G20 Liderlər Sammiti başlayıb. 

İnsider.az xəbər verir ki, G20 ölkələrinin liderləri sammit çərçivəsində rəqəmsal iqtisadiyyata həsr olunmuş xüsusi sessiya keçiriblər. Verilən məlumata görə, sessiya zamanı Yaponiyanın baş naziri Sindzo Abe, ABŞ Prezidenti Donald Tramp, Çin sədri Si Szinpin və Avropa Komissiyasının rəhbəri Jan Klod Yunker çıxış ediblər.

Görüş iştirakçıları rəqəmsal iqtisadiyyat, ticarət və elektron kommersiyanın vacib olduğunu təsdiq ediblər.

Açıq bazarlara bağlılığın mühümlüyünü qeyd edən ABŞ Prezidenti rəqəmsal iqtisadiyyatın öz növbəsində qlobal iqtisadiyyatın inkişafına kömək etdiyini bildirib.

Qeyd edək ki, G20-da aparılan danışıqlarda veriləcək qərarlar ölkələr tərəfindən yaxından təqib edilir. Həmçinin, dünya liderlərinin keçirəcəyi ikitərəfli görüşlər diqqət mərkəzində olacaqdır.

ABŞ Prezidenti Donald Tramp və Çin Dövlət başçısı Si Cinpingin reallaşdırması gözlənilən görüşün isə, iki ölkə arasında gedən ticarət müharibələrində konstruktiv addımın atılmasına səbəb ola biləcəyi qeyd edilir.