“Google” kommersiya istifadəsi üçün yeni “Glass Enterprise Edition 2” “ağıllı” eynəklərini təqdim edib. İnsider.az bunu şirkətin bloqundakı ismarışa istinadla xəbər verir.

Cihaz “Qualcomm Snapdragon XR1” prosessorunda çalışır. Şirkətdən qeyd edirlər ki, bu, təkmilləşdirilmiş səmərəliliyi və kompyuter görmə dəstəyini təmin edir.

“Google” yeni “Glass Enterprise”-ə cəld enerji yığma funksiyalı USB-C portunu əlavə edib. Akkumulyator tutumu 820 milliamper-saatdır ki, bu da səkkiz saatadək avtonom iş rejimini təmin edir.

“Glass Enterprise Edition 2” “Android” platformasında açıq ilkin kodla çalışır. Cihaz həmçinin biznes üçün olan “Android Enterprise Mobile Device Management” mobil platformasını dəstəkləyir.

Eynəklər “Wi-Fi” və ya “Bluetooth” üzərindən video translyasiyası üçün 8 MP kamera ilə təchiz olunub. Cihazın yaddaş həcmi 32 GB təşkil edir.

İstifadəçilər “Glass Enterprise”-ı təlimatların baxışı, kontrol şəkillərin göndərilməsi və ya digər məsələlərin yerinə yetirilməsi üçün istifadə edə bilərlər. “Google”-da iddia edirlər ki, cihazı tətbiq etmiş şirkətlər işin effektivliyinin 20-50% artması barədə xəbər verirlər.

“Google Enterprise” sifarişçiləri arasında “DHL” təchizat şirkəti, “Sutter Health” səhiyyə təşkilatı və “AGCO” kənd təsərrüfatı avadanlığı istehsalçısı var.

“Google”-un cihaz üçün təyin etdiyi qiymət 999 dollardır. Bununla yanaşı, “Google”-un “Google Enterprise”-ı konkret sahə üçün təkmilləşdirən bir neçə partnyoru var – bundan asılı olaraq da, qiymət dəyişə bilər. 

Samirə Məmmədova