"MacOS" əməliyyat sistemi çox vaxt "Windows" platformasına daha təhlükəsiz alternativ kimi təqdim edilir. Lakin kibertəhlükəsizlik sahəsi üzrə ixtisaslaşmış "Red Canary" şirkətinin bu yaxınlardakı hesabatına əsasən, yeni virus artıq dünyada 30 mindən çox "Mac" kompüterini yoluxdurub. Bu, həm "M1" prosessoru, həm də "Intel" prosessorları ilə işləyən modellərə aiddir.

"Silver Sparrow" adlandırılmış zərərli proqram təminatı "macOS" sistemində əmrlərin icrası üçün "JavaScript" proqramlaşdırma dilindən istifadə edir. Virusun iki versiyası var: birincisi, "Intel" prosessorları üçün kompilyasiya olunmuş mach-object formatında ikilik fayl, ikincisi isə "Apple M1" çipi ilə təchiz edilmiş qurğuları hədəf alıb.

Zərərli proqram təminatı 153 ölkədə aşkar edilib, ABŞ, Böyük Britaniya, Kanada, Fransa və Almaniyada daha çox virusa yoluxmuş kompüter qeydə alınıb. Tədqiqatçılar bildiriblər ki, "Apple" şirkəti istifadəçiləri bu təhlükədən qorumaq üçün artıq müvafiq tədbirlər görür.

ICTnews