“Yandex” axtarış sistemi şirkəti restrukturizasiya barədə elan edib. Belə ki, Niderlandın “Yandex N.V.” şirkəti biznesini 475 milyard rubla (8,8 milyard manat) investorlar konsorsiumuna satacaq və ana şirkət olmaqdan çıxacaq.

Eyni zamanda, menecer komandası xüsusi səhmdar hüquqları əldə edəcək və şirkəti idarə etməyə davam edəcək.

Qrupun yeni ana şirkəti Rusiyanın Kalininqrad vilayətində qeydiyyatdan keçmiş “Yandex” olacaq.

Şirkətin əsas sahibi “Yandex” menecerlərinin başçılıq etdiyi “Konsorsium.Pervıy”, habelə “Leta Capital” vençur fondunun təsisçisi Aleksandr Çaçavanın, “Infinitum” depozitarının rəhbəri Pavel Prassın, LUKOIL qrupunun və sahibkar Aleksandr Ryazanovun strukturları olacaq.

Mövcud idarəetmə komandası qrupun əhəmiyyətli yenidən təşkili, büdcənin təsdiqi, iri əməliyyatların təsdiqi və Nizamnaməyə dəyişikliklər kimi əsas qərarların qəbulu üçün xüsusi səhmdar hüquqları əldə edəcək. Bu məqsədlə “Menecerlər Fondu” dövlət qeydiyyatına alınıb.

Artyom Savinovski “Yandex”in baş direktoru olaraq qalacaq; şirkət İsraildə yaradılmış “Nebius”, “Toloka”, “Avride” və “TripleTen” startapları, həmçinin Finlandiyada data mərkəzi istisna olmaqla “Yandex N.V.” qrupunun bizneslərini, xidmətlərini və aktivlərini özündə saxlayacaq.

“Yandex restrukturizasiyadan sonra özəl, müstəqil və ictimai şirkət olaraq qalacaq”, - bəyanatda deyilir.

Oxu.Az