Simsiz qulaqlıqlar, digər oxşar cihazlar kimi ionlaşmayan radiasiya yayır. Onların sağlamlığa mənfi təsirlərinin, yaxud da əksinə təhlükəsizliyinin birmənalı sübutu yoxdur.

“Praym”ın məlumatına görə, bu barədə “Roskaçestvo” Rəqəmsal Ekspertiza Mərkəzinin rəhbəri Anton Kukanov bildirib.

Onun sözlərinə görə, istehlakçılar adətən simsiz qulaqlıqların radiasiyanı mümkün qədər başa yaxın ötürməsindən narahatdırlar.

“Burada bunun mobil telefonlardan bir neçə dəfə az olduğunu anlamalısınız. Bu səbəbdən simsiz qulaqlıqlar nəzəri olaraq daha az riskə səbəb olur”, - deyə ekspert izah edib.

Onun sözlərinə görə, ABŞ-ın “Consumer Reports” istehlak təşkilatının mütəxəssisləri hətta mobil telefonlardan potensial riskin azaldılmasının yollarından birinin qulaqlıq (hətta simsiz) istifadə etmək olduğunu iddia edirlər.

Simsiz cihazların sağlamlığına zərər verə biləcəyindən qorxanlar üçün Kukanov bu tip qulaqlıqlardan istifadə müddətini məhdudlaşdırmağı - gün boyu onlarla gəzməməyi və onlarla yatmamağı tövsiyə edir.

“Ayrıca, yüksək səsin, xüsusən də uzun müddət qulaqlıq istifadə edildikdə eşitməyə mənfi təsir göstərdiyini unutmayın. Bu vəziyyətdə eşitmə duyğu hüceyrələri zədələnir, bu da eşitmə itkisinə səbəb ola bilər. Bunun qarşısını almaq üçün belə qulaqlıqlar gündə üç saatdan çox istifadə edilməməlidir (davamlı maksimum iki saat), həmçinin səs yüksək olmamalıdır”, - deyə Kukanov sözlərini yekunlaşdırıb.