ABŞ Prezidenti Donald Trump, Barak Obama dövründə Türkiyəyə Patriotların satılmamasının səhv qərar olduğunu, bununla bərabər, Rusiyadan S-400 alması səbəbilə Türkiyəyə F-35 hərbi təyyarələrini satmayacaqlarını bildirib.

İnsider.az "Marja"-ya istinadən xəbər verir ki, Tramp, Türkiyənin Rusiyadan keçən həftə S-400 hava müdafiə sistemlərini almağa başlamasına dair Ağ Evdəki kabinet toplantısında Türkiyə və F-35-lərlə bağlı açıqlama verib.

Barak Obama dövründə Türkiyəyə Patriot satılmamasına görə əvvəlki hakimiyyəti tənqid edən Tramp, Türkiyənin buna görə Rusiyadan S-400 aldığını bildirib.

"Türkiyə bu raketləri satın almaq üçün çox çalışdı, ancaq satmadılar"

Türkiyə ilə bu barədə danışdıqlarını dilə gətirən Tramp deyib:

"Açığını deyim, Türkiyə ilə yaxşı münasibətlərimiz var. Lakin bu vəziyyət çox mürəkkəb bir vəziyyətdir. Obamanın hökuməti onlara Patriot raketlərini satmadı. Türkiyə bu raketləri satın almaq üçün çox çalışdı, ancaq satmadılar. Türkiyədə Rusiyadan raketləri aldı. Sonra Türkiyəyə "Yaxşı sizə Patriotları satacağıq" dedilər, amma o zaman Türkiyə onsuz da Rusiya ilə müqavilə imzalayıb və ciddi bir ödəmə etmişdi, çünki buradan almalarına icazə verilməmişdi. Türkiyə bir NATO üzvüdür. 100-dən çox F-35 üçün sifariş verdilər, əlavə sifariş də planlaşdırırdılar".

"Bu vəziyyətin üzərində çalışırıq"

Türkiyə və Prezident Rəcəb Tayyib Ərdoğan ilə yaxşı əlaqələri olduğunu bildirən Tramp,"Türkiyə bizə qarşı çox yaxşıdır. İndi isə onlara Rusiyadan raket sistemi almaq məcburiyyətində qaldıqları üçün bu F-35-ləri satmayacağımızı deyirik. Onların içində olduğu vəziyyət çox çətindir, ABŞ kimi bizim də düşdüyümüz vəziyyət çox çətindir. Bu vəziyyətin üzərində çalışırıq, nələr olacağını görəcəyik",- deyib.

Türkiyənin ABŞ-dan Patriot almasına icazə verilmədiyini bir daha vurğulayan Trump, "Daha sonra Türkiyə bir başqa ölkədən, Rusiyadan, raket satın almaq məcburiyyətində qaldı ki, o (Ərdoğan) əslində həqiqətən onları istəmirdi. İndi də Rusiyadan bunu aldıqları üçün milyardlarla dollar dəyərində hərbi təyyarələri Türkiyəyə satmırıq",- əlavə edib.

Həmçinin Tramp, yaranmış vəiyyətə görə F-35 təyyarələrinin istehsalçısı "Lockheed Martin" şirkətininin məmnun olmadığını, çünki şirkət üçün bunun minlərlə məşğulluq mənasına gəldiyini qeyd edib.

Türkiyə Prezidenti Rəcəb Tayyib Ərdoğan, Türkiyənin S-400 alışı ilə bağlı dünən verdiyi açıqlamada, "S-400-lərimizi almağa başladıq. "Ala bilməzsiz" dedilər, bu gün səkkizinci təyyarə də gəldi",- demişdi.