Moskva Fizika-Texnika İnstitutunun alimləri məlumatların bir hissəsini yadda saxlayan və uzun müddət müraciət edilməyi halda informasiyanı "unudan" qurğu təqdim ediblər. Alimlər sözügedən qurğunu memristor (ondan keçən enerjidən asılı olaraq öz müqavimət qabiliyyətini dəyişdirə bilən element) əsasında hazırlayıblar. Alimlər yeni qurğunun köməyilə məlumatları insan kimi yadda saxlayacaq və öyrənəcək neyromorfik kompüter hazırlamaq istəyirlər.

İnsider.az xəbər verir ki, yeni qurğu insan beyninin hissələrinin fəaliyyətini imitasiya edir. Məsələn, alimlər sinapsın iş prinsiplərini əsas götürərək funksiya reallaşdırıblar ki, nəticədə qurğu lazım olan informasiyanı yadda saxlayır, sonra isə sistem üçün az əhəmiyyət daşıyan və ya uzun müddət müraciət olunmayan hissəni unudur. Bir neçə belə qurğu yeni neyromorfik kompüterlərin yaradılması üçün əsas ola bilər.

Neyromorfik kompüterlər – bu, insan beyninin iş prinsiplərini imitasiya edən qurğulardır. Onlar məlumatların ötürülməsi, saxlanılması və qəbul edilməsi üçün məsuliyyət daşıyan neyron, akson və dendritlərin fəaliyyətini modelləşdirir.